Vasubandhu - Abhidharmakoshakarika - Part 21
རང་དབང་དེ་བཞིན་དྲི་མ་རྣམས། ། འདོད་ན་མི་དགེ་གསུམ་རྣམ་གཉིས། ། དེ་ཡན་ཆད་ནི་ལུང་མ་བསྟན། ། འདོད་དང་བསམ་གཏན་དང་པོ་ན། ། གཡོ་སྒྱུ་ཚངས་པས་འདྲིད་ཕྱིར་རོ། ། རྨུགས་རྒོད་རྒྱགས་པ་ཁམས་གསུམ་ན། ། གཞན་དག་འདོད་ཁམས་ལས་སྐྱེས་པ། ། མཐོང་སྤང་བྱ་གཉིད་ང་རྒྱལ་བཅས། ། ཡིད་ཀྱི་རྣམ་ཤེས་ས་པ་ཡིན། ། ཉེ་བའི་ཉོན་མོངས་རང་དབང་ཡང་། ། གཞན་ནི་རྣམ་ཤེས་དྲུག་རྟེན་ཅན། ། བདེ་བ་དག་དང་འདོད་ཆགས་སུ། ། མཚུངས་ལྡན་ཞེ་སྡང་བཟློག་པ་འོ། ། མ་རིག་པ་དག་ཐམས་ཅད་དང་། ། མེད་ལྟ་ཡིད་བདེ་སྡུག་བསྔལ་དང་། ། ཡིད་མི་བདེ་དང་ཐེ་ཚོམ་མོ། ། གཞན་ཡིད་བདེ་དང་འདོད་ལས་སྐྱེས། ། བཏང་སྙོམས་དད་ཀུན་ས་གོང་མ། ། ས་ཇི་བཞིན་དུ་རང་རང་དང་། ། འགྱོད་དང་ཕྲག་དོག་ཁྲོ་བ་དང་། ། རྣམ་འཚེ་འཁོན་དུ་འཛིན་པ་དང་། ། འཚིག་པ་ཡིད་མི་བདེ་བ་དང་། ། སེར་སྣ་དག་ནི་བཟློག་པ་ཡིན། ། གཡོ་དང་སྒྱུ་དང་འཆབ་དང་གཉིས། ། གཉིས་ཀ་དང་ལྡན་བདེ་དག་དང་། ། རྒྱགས་པ་བཏང་སྙོམས་ཀུན་ཏུ་འགྲོ། ། བཞི་པོ་གཞན་ནི་ལྔ་དག་དང་། ། འདོད་ན་སྒྲིབ་རྣམས་མི་མཐུན་དང་། ། ཟས་དང་བྱ་བ་གཅིག་པའི་ཕྱིར། ། གཉིས་གཅིག་ཕུང་པོ་གནོད་བྱེད་དང་། ། ཐེ་ཚོམ་ཕྱིར་ན་ལྔ་ཉིད་དོ། ། དམིགས་པ་ཡོངས་སུ་ཤེས་པ་དང་། ། དེ་ལ་དམིགས་པ་ཡང་དག་པར། ། ཟད་དང་དམིགས་པ་སྤངས་པས་སོ། ། གཉེན་པོ་སྐྱེས་པས་ཟད་པར་འགྱུར། ། གཉེན་པོ་རྣམ་བཞི་སྤོང་བ་དང་། ། གཞི་དང་སྲིད་ཉིད་རྣམ་པར་ནི། ། སུན་འབྱིན་ཞེས་བྱ་དམིགས་པ་ལས། ། ཉོན་མོངས་པ་ནི་སྤང་བྱར་འདོད། ། མཚན་ཉིད་མི་མཐུན་མི་མཐུན་ཕྱོགས། ། ཡུལ་རྣམ་ཆད་དང་དུས་ཀྱིས་ཏེ། ། འབྱུང་དང་ཚུལ་ཁྲིམས་ཕྱོགས་དང་ནི། ། དུས་གཉིས་རིང་བ་ཉིད་ལྟ་བུའོ། ། ལན་ཅིག་ཏུ་ཟད་དེ་དག་གི །བྲལ་བའི་ཐོབ་པ་ཡང་དང་ཡང་། ། གཉེན་པོ་སྐྱེས་དང་འབྲས་ཐོབ་དང་། ། དབང་པོ་རྣམ་པར་འཕེལ་རྣམས་སུ། ། ཡོངས་སུ་ཤེས་དགུ་འདོད་པ་ན། ། དང་པོ་རྣམ་གཉིས་ཟད་ལ་གཅིག །གཉིས་ཟད་པ་ནི་དེ་གཉིས་སོ། ། དེ་བཞིན་གོང་མའི་དེ་གསུམ་ཉིད། ། ཡོངས་སུ་ཤེས་པ་གཞན་གསུམ་སྟེ། ། ཐ་མའི་ཆ་དང་མཐུན་གཟུགས་དང་། ། ཟག་པ་ཀུན་ཟད་དྲུག་བཟོད་འབྲས། ། ལྷག་མ་རྣམས་ནི་ཤེས་པའི་ཡིན། ། མི་ལྕོགས་མེད་འབྲས་ཐམས་ཅད་དོ། ། བསམ་གཏན་རྣམས་ཀྱི་ལྔ་འམ་བརྒྱད། ། ཉེ་བར་བསྡོགས་པའི་གཅིག་ཡིན་ཏེ། ། གཟུགས་མེད་དངོས་གཞི་གསུམ་གྱི་ཡང་། ། ཐམས་ཅད་འཕགས་པའི་ལམ་གྱི་ཡིན། ། འཇིག་རྟེན་པའི་གཉིས་རྗེས་ཀྱི་ཡང་། ། ཆོས་ཤེས་པའི་ནི་གསུམ་ཡིན་ནོ། ། དེའི་ཕྱོགས་མཐུན་གྱི་དྲུག་དང་ལྔ། ། བྲལ་བའི་ཐོབ་པ་ཟག་མེད་དང་། ། སྲིད་རྩེ་ཉམས་པར་བྱས་པ་དང་། ། རྒྱུ་གཉིས་ཀུན་ཏུ་བཅོམ་པའི་ཕྱིར། ། ཡོངས་ཤེས་ཁམས་ལས་འདས་པ་ལས། ། གཅིག་མིན་མཐོང་ལ་གནས་པ་ནི། ། ལྔ་ཡི་བར་དང་ཡང་དག་ལྡན། ། བསྒོམ་ལ་གནས་པ་དྲུག་གམ་ནི། ། གཅིག་གམ་ཡང་ན་གཉིས་དང་ངོ་། ། ཁམས་ལས་འདོད་ཆགས་བྲལ་བ་དང་། ། འབྲས་བུ་ཐོབ་ཕྱིར་དེ་དག་བསྡོམས། ། ལ་ལ་གཅིག་གཉིས་ལྔ་དང་དྲུག །གཏོང་སྟེ་འཐོབ་པ་ལྔ་མིན་ནོ། ། ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས། ཕྲ་རྒྱས་བསྟན་པ་ཞེས་བྱ་བ་སྟེ་གནས་ལྔ་པའོ།། ༈ །།བདེན་པ་མཐོང་དང་བསྒོམས་པ་ལས། ། ཉོན་མོངས་སྤངས་པ་ཞེས་བཤད་པ། ། བསྒོམ་པའི་ལམ་ནི་རྣམ་གཉིས་ཏེ། ། མཐོང་བ་ཞེས་བྱ་ཟག་པ་མེད། ། བདེན་པ་དག་ནི་བཞིར་བཤད་དོ། །