Vasubandhu - Abhidharmakoshakarika - Part 15
སྐྲག་གནོད་མ་མཉམ་མྱ་ངན་གྱིས། ། སྒྲ་མི་སྙན་མིན་འདོད་ལྡན་རྣམས། ། ཡོན་སྐྱོན་སྙིགས་མར་གསུངས་པ་ནི། ། གཡོ་དང་ཞེ་སྡང་འདོད་ཆགས་སྐྱེས། ། དཀར་ནག་ལ་སོགས་བྱེ་བྲག་གིས། ། ལས་ནི་རྣམ་པ་བཞི་ཡིན་ནོ། ། མི་དགེ་གཟུགས་དང་འདོད་གཏོགས་པའི། ། དགེ་བ་ཉིད་ནི་རིམ་བཞིན་དུ། ། གནག་དང་དཀར་དང་གཉིས་ཀའི་ལས། ། དེ་ཟད་བྱེད་པ་ཟག་མེད་ཡིན། ། ཆོས་བཟོད་འདོད་ཆགས་བྲལ་བ་ཡི། ། བར་ཆད་མེད་ལམ་བརྒྱད་ཀྱི་གང་། ། སེམས་པ་རྣམ་པ་བཅུ་གཉིས་དེ། ། ནག་པོ་ཟད་པར་བྱེད་པའི་ལས། ། དགུ་པའི་སེམས་པ་གང་ཡིན་པ། ། དེ་ནི་དཀར་གནག་ཟད་བྱེད་ཡིན། ། དཀར་པོ་བསམ་གཏན་ཆགས་བྲལ་བའི། ། བར་ཆད་མེད་ལམ་སྐྱེས་ཐ་མས། ། གཞན་ནི་དམྱལ་བ་མྱོང་འགྱུར་དང་། ། འདོད་གཞན་མྱོང་འགྱུར་གཉིས་སུ་རིག །གཞན་ནི་མཐོང་བས་སྤང་བྱ་གནག །འདོད་པ་ལས་སྐྱེས་གཞན་དཀར་གནག །མི་སློབ་ལུས་ངག་ལས་ཡིད་ཉིད། ། ཐུབ་པའི་གསུམ་སྟེ་གོ་རིམ་བཞིན། ། ལེགས་སྤྱད་གསུམ་པོ་ཐམས་ཅད་ནི། ། གཙང་བྱེད་རྣམ་པ་གསུམ་ཡིན་ནོ། ། ལུས་ཀྱི་ལས་སོགས་མི་དགེ་བ། ། ཉེས་པར་སྤྱད་པ་གསུམ་དུ་འདོད། ། བརྣབ་སེམས་ལ་སོགས་ལས་མིན་ཡང་། ། ཡིད་ཀྱི་ཉེས་སྤྱད་རྣམ་གསུམ་མོ། ། བཟློག་པ་ལེགས་པར་སྤྱད་པ་ཡིན། ། དེ་ལས་ཆེ་ལོང་བསྡུས་ནས་ནི། ། དགེ་དང་མི་དགེ་ཅི་རིགས་པར། ། ལས་ཀྱི་ལམ་ནི་བཅུར་གསུངས་སོ། ། མི་དགེ་དྲུག་ནི་རྣམ་རིག་མིན། ། གཅིག་རྣམ་གཉིས་སོ་དེ་དག་ཀྱང་། ། བྱེད་ན་དགེ་བ་བདུན་རྣམ་གཉིས། ། ཏིང་འཛིན་ལས་སྐྱེས་རྣམ་རིག་མིན། ། ཉེར་བསྡོགས་རྣམས་ནི་རྣམ་རིག་བྱེད། ། རྣམ་རིག་བྱེད་མིན་འགྱུར་བའམ། ། མ་ཡིན་བཟློག་པ་མཇུག་ཡིན་ནོ། ། སྦྱོར་བ་རྩ་བ་གསུམ་ལས་སྐྱེས། ། དེ་ཡི་མཇུག་ཐོགས་ལས་བྱུང་ཕྱིར། ། བརྣབ་སེམས་སོགས་རྩ་གསུམ་ལས་སྐྱེས། ། དགེ་བ་སྦྱོར་དང་མཇུག་བཅས་རྣམས། ། ཆགས་སྡང་གཏི་མུག་མེད་ལས་སྐྱེས། ། གསོད་དང་གནོད་སེམས་ཚིག་རྩུབ་མོ། ། ཞེ་སྡང་གིས་ནི་མཐར་ཕྱིན་བྱེད། ། ལོག་གཡེམ་བརྣབ་སེམས་མ་བྱིན་ལེན། ། ཆགས་པ་ཡིས་ནི་རྫོགས་པར་བྱེད། ། ལོག་པར་ལྟ་བ་གཏི་མུག་གིས། ། ལྷག་མ་གསུམ་གྱིས་རྫོགས་པར་འདོད། ། གཞི་ནི་སེམས་ཅན་ལོངས་སྤྱོད་དང་། ། མིང་དང་གཟུགས་ནི་མིང་ཡིན་ནོ། ། སྔ་དང་མཉམ་དུ་ཤི་བ་ལ། ། དངོས་མེད་ལུས་གཞན་སྐྱེས་ཕྱིར་རོ། ། དམག་ལ་སོགས་པར་དོན་གཅིག་ཕྱིར། ། ཐམས་ཅད་བྱེད་པ་པོ་བཞིན་ལྡན། ། སྲོག་གཅོད་པ་ནི་བསམས་བཞིན་དུ། ། མ་ནོར་བར་ནི་གཞན་བསད་པའོ། ། མ་བྱིན་ལེན་པ་གཞན་གྱི་ནོར། ། མཐུ་དང་འཇབ་བུས་བདག་གིར་བྱེད། ། བགྲོད་མིན་འགྲོ་བ་འདོད་པ་ཡིས། ། ལོག་པར་གཡེམ་པ་རྣམ་པ་བཞི། ། རྫུན་ཚིག་འདུ་ཤེས་གཞན་སྒྱུར་པའི། ། ཚིག་དོན་མངོན་པར་གོ་བ་འོ། ། མིག་རྣ་ཡིད་ཀྱི་རྣམ་ཤེས་དང་། ། གསུམ་གྱིས་ཉམས་སུ་མྱོང་གང་དེ། ། མཐོང་ཐོས་རྣམ་པར་ཤེས་པ་དང་། ། རྟོགས་པ་ཡིན་ཏེ་རིམ་བཞིན་བཤད། ། ཕྲ་མ་ཕ་རོལ་དབྱེ་བའི་ཕྱིར། ། ཉོན་མོངས་ཅན་གྱི་སེམས་ཀྱི་ཚིག །ཚིག་རྩུབ་པོ་ནི་མི་སྙན་པ། ། ཉོན་མོངས་ཅན་ཀུན་བཀྱལ་པ་ཉིད། ། གཞན་ནི་དེ་ལས་གཞན་ཉོན་མོངས། ། ཁ་གསག་གླུ་དང་ཟློས་གར་བཞིན། ། བསྟན་བཅོས་ངན་བཞིན་བརྣབ་སེམས་ནི། ། ལོག་པས་གཞན་གྱི་ནོར་ལ་ཆགས། ། གནོད་སེམས་སེམས་ཅན་ལ་སྡང་བ། ། དགེ་དང་མི་དགེ་མེད་ལྟ་བ། ། ལོག་པར་ལྟ་བ་ཡིན་འདི་ལ། །