Gampopa - Jewel Ornament Of Liberation - Part 96
༈ ཨོཾ་སྭསྟི་སིདྡྷི་རསྟུ། དེང་འདིར་གསུང་རབ་རིན་ཆེན་འཕྲུལ་པར་དུ། །བཞེངས་དགེས་ལེགས་བྱས་འདིས་མཚོན་དུས་གསུམ་དུ། །བགྱིས་པའི་དགེ་ཚོགས་དྲི་མ་མེད་པ་རྣམས། །གཅིག་ཏུ་བསྡོམས་ཏེ་མཐུན་རྐྱེན་སྒྲུབ་རྣམས་དང༌། །བསྟན་པའི་སྦྱིན་བདག་ཚེ་རིང་འབྱོར་ལྡན་ཞིང༌། །མ་གྱུར་ནམ་མཁའི་མཐའ་མཉམ་འགྲོ་བ་ཀུན། །སྒྲིབ་གཉིས་བྱང་ཞིང་ཚོགས་གཉིས་མྱུར་རྫོགས་ཏེ། །བླ་མེད་རྣམ་གྲོལ་ཐོབ་པའི་རྒྱུ་རུ་བསྔོ། །བསྟན་འཛིན་དམ་པ་གང་ན་སུ་བཞུགས་རྣམས། །སྐུ་ཚེའི་རྐྱེན་གེགས་ཐ་དག་རབ་ཞི་ནས། །བསྟན་འགྲོའི་དོན་ཆེན་བླ་མེད་མཛད་བཞིན་དུ། །དམ་ཆོས་བདུད་རྩིའི་སྦྲང་ཆར་འབེབས་གྱུར་ཅིག །ཡངས་པའི་རྒྱལ་ཁམས་ཀུན་ཏུ་ལོ་ལེགས་ཤིང༌། །ནད་མུག་འཁྲུག་རྩོད་ཐམས་ཅད་ཞི་བ་དང༌། །མི་མཐུན་རྒུད་པའི་མིང་ཡང་མི་གྲགས་པར། །རྫོགས་ལྡན་དང་པོའི་ལང་ཚོ་འཆར་བར་ཤོག །དེའི་མཐུས་ཁ་བ་རིས་པའི་སྐྱེ་དགུའི་ཡིད། །རྣམ་དཀར་དགེ་བའི་ལས་ལ་ཕྱོགས་པ་དང༌། །མཐུན་རྐྱེན་ལེགས་ཚོགས་གོང་ནས་གོང་འཕེལ་ཏེ། །དམ་ཆོས་འཛིན་པའི་སྣོད་དུ་རུང་བར་ཤོག །འཇིག་རྟེན་དབང་ཕྱུག་ཕྱག་ན་པདྨོ་ཡི། །ཞབས་པད་བྷོ་ཊའི་ལྗོངས་འདིར་མྱུར་བཀོད་དེ། །ཞི་བསིལ་ཆོས་ཀྱི་བདུད་རྩིའི་ཟིལ་མངར་རོར། །ལོངས་སུ་སྤྱོད་པའི་སྐལ་བཟང་མྱུར་འཆར་ཤོག །ཁྱད་པར་བསྟན་པའི་སྙིང་པོ་སྒྲུབ་བརྒྱུད་ཀྱི། །རིང་ལུགས་དྲི་མེད་ས་ཆེན་ཡོངས་ཁྱབ་སྟེ། །བསྟན་པ་འཛིན་པའི་སྐྱེས་བུ་དམ་པ་རྣམས། །སྐུ་ཚེ་མི་འགྱུར་ཚེ་ལྷའི་ངོ་བོར་བརྟན། །ཕྲིན་ལས་མི་ཟད་ཉི་ཟླའི་འོད་དང་སྡེབ། །འདུས་ཚོགས་དགེ་འདུན་བགྲང་ཡས་རྒྱུ་སྐར་ལ། །ཟབ་རྒྱས་ཆོས་ཀྱི་གྲུ་ཆར་འབེབས་པར་ཤོག །ལྷ་རྣམས་མཁའ་ལ་ཤིས་པའི་གླུ་དབྱངས་ལེན། །འགྲོ་རྣམས་བདེ་ཞིང་སྐྱིད་པའི་ཡུན་དུ་འཚོ། །ཀླུ་རྣམས་དགའ་བས་ནོར་འཛིན་དབྱིག་གིས་བཀང༌། །མཐར་ཐུག་སངས་རྒྱས་ཡེ་ཤེས་ཐོབ་པར་ཤོག །ཅེས་པའང་ ༧ རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཆོག་དགུང་གྲངས་བཅུ་གསུམ་སྟེང༌། འོག་མིན་མཚུར་ཕུའི་གདན་སར་ལྗགས་རྩོམ་གནང་བའི་རྟེན་གསུམ་གསར་བཞེངས་ཀྱི་དགེ་བསྔོའི་སྨོན་ཚིག་བྱིན་རླབས་ཅན་ནོ།། །།
༈ ཡིད་བཞིན་ནོར་འདྲའི་དམ་ཆོས་རིན་པོ་ཆེ། །དྭགས་པོ་ཐར་རྒྱན་པར་བསྐྲུན་བགྱིས་པ་ལ། །བདག་ཉིད་སྦྱངས་པ་ཆུང་བས་ནོངས་པ་སོགས། །སྐྱེས་བུ་དམ་པ་རྣམས་ཀྱིས་བཟོད་པར་གསོལ། །འདི་ལ་ཅུང་ཟད་འབད་པའི་དགེ་བ་དང༌། །མཐུན་རྐྱེན་གྲུབ་པའི་སྦྱིན་བདག་ཆཱི་ཆཱིང་ཧུཡིས། །ལོངས་སྤྱོད་སྙིང་པོར་གྲུབ་པ་དེ་མཐུས་དང༌། །གཞན་ཡང་རྣམ་དཀར་ལེགས་ཚོགས་བགྱིས་པ་དེས། །ཕྱོགས་བཅུར་བཞུགས་པའི་བསྟན་འཛིན་སྐྱེས་བུ་རྣམས། །ཞབས་པད་བརྟན་ཅིང་མཛད་ཕྲིན་ཡིད་བཞིན་འགྲུབ། །འདུས་སྡེ་ཐུགས་མཐུན་ཁྲིམས་གཙང་བསླབ་གསུམ་གྱིས། །བརྒྱན་ཏེ་བསྟན་པ་ཡུན་རིང་གནས་པར་ཤོག །དེ་མཐུས་འཇིག་རྟེན་ཁམས་སུ་རྟག་ཏུ་བདེ། །རྒྱུ་སྦྱོར་ཡོན་བདག་དེ་ཉིད་ཚེ་བསོད་སོགས། །རྒྱས་ཤིང་བསམ་དོན་འབད་མེད་ལྷུན་གྱིས་འགྲུབ། །མྱུར་དུ་མངོན་འཚང་རྒྱ་བའི་རྒྱུར་གྱུར་ཅིག །ཅེས་པའང་སྐབས་ཀྱི་ཞུ་དག་གི་སྲི་ཞུ་བ་ཀརྨ་ལེགས་བཤད་གླིང་བཤད་གྲྭའི་མཁན་མིང་འཛིན་པ་ཀརྨ་བི་ཛ་ཡས་སྨོན་པ་དགེའོ།། །།སརྦ་མངྒ་ལཾ།། །།