Vasubandhu - Abhidharmakoshakarika - Part 5
གང་ལ་ཡོད་པ་དེ་བསྣན་ནོ། ། དེ་ལས་འགྱོད་གཉིད་མི་དགེ་རྣམས། ། བསམ་གཏན་དང་པོ་དག་ན་མེད། ། རྟོག་པའང་བསམ་གཏན་ཁྱད་པར་ཅན། ། དེ་ཡི་གོང་ན་དཔྱོད་པ་ཡང་། ། མ་གུས་ངོ་ཚ་མེད་ཁྲེལ་མེད། ། ཁ་ན་མ་ཐོ་འཇིགས་མི་ལྟ། ། དགའ་དང་གུས་ཉིད་ངོ་ཚ་ཤེས། ། དེ་གཉིས་འདོད་དང་གཟུགས་དག་ནི། ། རྟོག་དང་དཔྱོད་པ་རྩིང་ཞིབ་ཉིད། ། ང་རྒྱལ་ཁེངས་པ་རྒྱགས་པ་ནི། ། རང་གི་ཆོས་ལ་ཆགས་པ་ཡི། ། སེམས་ནི་ཡོངས་སུ་གཏུགས་པ་འོ། ། སེམས་དང་ཡིད་དང་རྣམ་ཤེས་ནི། ། དོན་གཅིག་སེམས་དང་སེམས་བྱུང་དང་། ། རྟེན་དང་དམིགས་དང་རྣམ་བཅས་དང་། ། མཚུངས་པར་ལྡན་པའང་རྣམ་པ་ལྔ། ། མི་ལྡན་པ་ཡི་འདུ་བྱེད་རྣམས། ། ཐོབ་དང་མ་ཐོབ་སྐལ་མཉམ་དང་། ། འདུ་ཤེས་མེད་སྙོམས་འཇུག་པ་དང་། ། སྲོག་དང་མཚན་ཉིད་རྣམས་དང་ནི། ། མིང་གི་ཚོགས་ལ་སོགས་པ་ཡང་། ། ཐོབ་པ་རྙེད་དང་ལྡན་པ་འོ། ། ཐོབ་དང་མ་ཐོབ་རང་རྒྱུད་དུ། ། གཏོགས་པ་རྣམས་ཀྱིའོ་འགོག་གཉིས་ཀྱི། ། དུས་གསུམ་པ་ཡི་རྣམ་པ་གསུམ། ། དགེ་ལ་སོགས་ཀྱི་དགེ་ལ་སོགས། ། དེར་གཏོགས་རྣམས་ཀྱི་རང་ཁམས་པ། ། མ་གཏོགས་རྣམས་ཀྱི་རྣམ་པ་བཞི། ། སློབ་དང་མི་སློབ་མིན་གྱི་གསུམ། ། སྤང་བྱ་མིན་པའི་རྣམ་གཉིས་འདོད། ། ལུང་བསྟན་མིན་ཐོབ་ལྷན་ཅིག་སྐྱེས། ། མངོན་ཤེས་སྤྲུལ་པ་མ་གཏོགས་པ། ། བསྒྲིབས་པའི་གཟུགས་ཀྱིའང་འདོད་པ་ན། ། གཟུགས་ཀྱི་སྔར་ནི་སྐྱེ་བ་མེད། ། མ་ཐོབ་མ་བསྒྲིབས་ལུང་མ་བསྟན། ། འདས་མ་སྐྱེས་ཀྱི་དེ་རྣམ་གསུམ། ། འདོད་སོགས་གཏོགས་དང་དྲི་མེད་ཀྱིའང་། ། ལམ་མ་ཐོབ་པ་སོ་སོ་ཡི། ། སྐྱེ་བོར་འདོད་དོ་དེ་ཐོབ་དང་། ། ས་འཕོས་ནས་༼རྣམས་༽ནི་རྣམ་ཉམས་འགྱུར། ། སྐལ་མཉམ་སེམས་ཅན་འདྲ་བ་འོ། ། འདུ་ཤེས་མེད་པ་བ་འདུ་ཤེས། ། མེད་པར་སེམས་དང་སེམས་བྱུང་རྣམས། ། འགོག་པའོ་རྣམ་སྨིན་དེ་འབྲས་ཆེ། ། དེ་བཞིན་འདུ་ཤེས་མེད་སྙོམས་འཇུག །བསམ་གཏན་ཐ་མར་འབྱུང་འདོད་པས། ། དགེ་བའོ་སྐྱེས་ནས་མྱོང་འགྱུར་ཉིད། ། འཕགས་པའི་མ་ཡིན་དུས་གཅིག་འཐོབ། ། འགོག་པ་ཞེས་པའང་དེ་བཞིན་ཉིད། ། འདི་གནས་དོན་དུ་སྲིད་རྩེ་སྐྱེས། ། དགེ་བའོ་གཉིས་སུ་མྱོང་འགྱུར་དང་། ། མ་ངེས་འཕགས་པའི་སྦྱོར་བས་འཐོབ། ། ཐུབ་པའི་བྱང་ཆུབ་ཀྱིས་འཐོབ་བྱ། ། དང་པོར་མ་ཡིན་སྐད་ཅིག་མ། ། སུམ་ཅུ་རྩ་བཞིས་ཐོབ་ཕྱིར་རོ། ། གཉིས་ཀ་འདོད་དང་གཟུགས་རྟེན་ཅན། ། འགོག་པ་དང་པོར་མིའི་ནང་དུ། ། སྲོག་ནི་ཚེ་ཡིན་དྲོད་དང་ནི། ། རྣམ་ཤེས་རྟེན་གང་ཡིན་པ་འོ། ། མཚན་ཉིད་དག་ནི་སྐྱེ་བ་དང་། ། རྒ་དང་གནས་དང་མི་རྟག་ཉིད། ། དེ་དག་སྐྱེ་བའི་སྐྱེ་ལ་སོགས། ། དེ་ཆོས་བརྒྱད་དང་གཅིག་ལ་འཇུག །རྒྱུ་དང་རྐྱེན་དག་མེད་པར་ནི། ། སྐྱེ་བས་བསྐྱེད་བྱ་སྐྱེད་བྱེད་མིན། ། མིང་གི་ཚོགས་ལ་སོགས་པ་ནི། ། མིང་དང་ངག་དང་ཡི་གེའི་ཚོགས། ། འདོད་དང་གཟུགས་གཏོགས་སེམས་ཅན་སྟོན། ། རྒྱུ་མཐུན་ལུང་བསྟན་མིན་དེ་བཞིན། ། སྐལ་མཉམ་རྣམ་པར་སྨིན་པའང་ཡིན། ། ཁམས་གསུམ་པ་སྟེ་ཐོབ་རྣམ་གཉིས། ། མཚན་ཉིད་རྣམས་ཀྱང་སྙོམས་འཇུག་དང་། ། མི་ལྡན་པ་དག་རྒྱུ་མཐུན་པ། ། བྱེད་རྒྱུ་ལྷན་ཅིག་འབྱུང་བ་དང་། ། སྐལ་མཉམ་མཚུངས་པར་ལྡན་པ་དང་། ། ཀུན་ཏུ་འགྲོ་དང་རྣམ་སྨིན་དང་། ། རྒྱུ་ནི་རྣམ་པ་དྲུག་ཏུ་འདོད། ། རང་ལས་གཞན་པ་བྱེད་རྒྱུའི་རྒྱུ། ། ལྷན་ཅིག་འབྱུང་གང་ཕན་ཚུན་འབྲས། །