Vasubandhu - Abhidharmakoshakarika - Part 18
དེ་དག་ཆུང་དང་ཆེ་བ་ལས། ། ལས་ཀྱང་ཆུང་དང་ཆེ་བ་ཉིད། ། བསམས་བཞིན་པ་དང་རྫོགས་པ་དང་། ། མི་འགྱོད་གཉེན་པོ་མེད་པ་དང་། ། འཁོར་དང་རྣམ་པར་སྨིན་པ་ལས། ། བསགས་པའི་ལས་ཞེས་བྱ་བ་ཡིན། ། མཆོད་རྟེན་ལ་བཏང་རྒྱུས་བྱུང་བའི། ། བསོད་ནམས་ལེན་མེད་བྱམས་སོགས་བཞིན། ། རྒྱུ་ལས་འབྲས་བུ་མི་འཁྲུལ་ཕྱིར། ། ངན་པའི་ཞིང་ལའང་༼ལས་༽འབྲས་ཡིད་འོང་། ། འཆལ་བའི་ཚུལ་ཁྲིམས་མི་དགེའི་གཟུགས། ། དེ་སྤོང་ཚུལ་ཁྲིམས་རྣམ་གཉིས་སོ། ། སངས་རྒྱས་ཀྱིས་ནི་བཅས་པ་ཡང་། ། རྣམ་དག་ཡོན་ཏན་བཞི་ལྡན་ནོ། ། འཆལ་ཁྲིམས་དེའི་རྒྱུས་འཕེན་མ་བྱུང་། ། དེ་གཉེན་པོ་དང་ཞི་ལ་བརྟེན། ། མཉམ་པར་བཞག་པའི་དགེ་བ་ནི། ། བསྒོམ་པའོ་སེམས་ལ་སྒོ་ཕྱིར་རོ། ། མཐོ་རིས་དོན་དུ་ཚུལ་ཁྲིམས་དང་། ། འབྲལ་བའི་དོན་དུ་བསྒོམ་གཙོའི་ཕྱིར། ། བསྐལ་པར་མཐོ་རིས་དགའ་གནས་ཕྱིར། ། བཞི་ཡི་ཚངས་པའི་བསོད་ནམས་ཡིན། ། ཆོས་སྦྱིན་ཉོན་མོངས་ཅན་མིན་པས། ། མདོ་སོགས་ཡང་དག་ཇི་བཞིན་སྟོན། ། བསོད་ནམས་མྱ་ངན་འདས་པ་དང་། ། ངེས་འབྱེད་ཆ་མཐུན་དགེ་རྣམ་གསུམ། ། རིགས་པས་རབ་ཏུ་བཅུག་པའི་ལས། ། རྣམ་གསུམ་ཀུན་སློང་བཅས་པ་ནི། ། ཡིག་འབྲུ་བརྒྱ་དང་བགྲང་བཅས་པའི། ། སྙན་ངག་གྲངས་ཏེ་གོ་རིམ་བཞིན། ། བསྒྲིབས་ངན་ཁ་ན་མ་ཐོ་བཅས། ། ཉོན་མོངས་ཅན་ཆོས་དྲི་མེད་༼དག་༽དགེ །གྱ་ནོམ་འདུས་བྱས་དགེ་བསྟེན་བྱ། ། ཐར་པ་བླ་ན་མེད་པ་ཡིན། ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས། ལས་བསྟན་པ་ཞེས་བྱ་བ་སྟེ་གནས་བཞི་པའོ།། ༈ །།སྲིད་པའི་རྩ་བ་ཕྲ་རྒྱས་དྲུག །འདོད་ཆགས་དེ་བཞིན་ཁོང་ཁྲོ་དང་། ། ང་རྒྱལ་མ་རིག་ལྟ་བ་དང་། ། ཐེ་ཚོམ་ཡིན་ཏེ་དེ་དྲུག་ཀྱང་། ། འདོད་ཆགས་དབྱེ་བས་བདུན་དུ་བཤད། ། ཁམས་གཉིས་ལས་སྐྱེས་སྲིད་འདོད་ཆགས། ། ཁ་ནི་ནང་དུ་བལྟས་ཕྱིར་དེར། ། ཐར་པའི་འདུ་ཤེས་བཟློག་ཕྱིར་བཤད། ། ལྟ་བ་ལྔ་སྟེ་འཇིག་ཚོགས་དང་། ། ལོག་དང་མཐར་འཛིན་ལྟ་བ་དང་། ། ལྟ་བ་དང་ནི་ཚུལ་ཁྲིམས་དང་། ། བརྟུལ་ཞུགས་མཆོག་ཏུ་འཛིན་དང་བཅུ། ། དེ་དག་བཅུ་དང་བདུན་བདུན་བརྒྱད། ། ལྟ་བ་གསུམ་གཉིས་མ་གཏོགས་པ། ། འདོད་ན་སྡུག་བསྔལ་ལ་སོགས་པ། ། མཐོང་བས་རིམ་བཞིན་སྤོང་བར་བྱེད། ། བཞི་ནི་བསྒོམ་པས་སྤང་བྱ་ཡིན། ། ཁོང་ཁྲོ་མ་གཏོགས་དེ་དག་ཉིད། ། གཟུགས་ཁམས་གཟུགས་མེད་དེ་དང་འདྲ། ། དེ་ལྟར་དགུ་བཅུ་བརྒྱད་དུ་འདོད། ། སྲིད་རྩེ་ལས་སྐྱེས་བཟོད་པ་ཡིས། ། གཞོམ་བྱ་མཐོང་བས་སྤང་བྱ་ཉིད། ། ལྷག་སྐྱེས་མཐོང་དང་བསྒོམ་གཉིས་ཀྱིས། ། བཟོད་པས་གཞོམ་མིན་བསྒོམ་ཁོ་ནས། ། བདག་དང་བདག་གི་རྟག་ཆད་དང་། ། མེད་དང་དམན་ལ་མཆོག་ལྟ་དང་། ། རྒྱུ་མིན་ལམ་མིན་དེར་ལྟ་བ། ། དེ་དག་ལྟ་བ་ལྔ་ཡིན་ནོ། ། དབང་ཕྱུག་སོགས་རྒྱུར་མངོན་ཞེན་པ། ། རྟག་བདག་ཕྱིན་ཅི་ལོག་པ་ཡིས། ། རབ་ཏུ་འཇུག་པས་དེ་ཕྱིར་དེ། ། སྡུག་བསྔལ་མཐོང་བས་སྤང་བྱ་ཉིད། ། ལྟ་བ་གསུམ་ལས་ཕྱིན་ཅི་ལོག །བཞི་ཚན་ཕྱིན་ཅི་ལོག་ཕྱིར་དང་། ། ངེས་རྟོག་ཕྱིར་དང་སྒྲོ་འདོགས་ཕྱིར། ། སེམས་དང་འདུ་ཤེས་དེའི་དབང་གིས། ། ང་རྒྱལ་བདུན་རྣམ་དགུ་གསུམ་པོ། ། མཐོང་དང་བསྒོམ་པས་ཟད་བྱ་བ། ། བསྒོམ་པས་སྤང་བར་བྱ་བ་ནི། ། གསོད་སོགས་ཀུན་ནས་དཀྲིས་པའོ། ། དེ་བཞིན་འཇིག་སྲེད་འཕགས་པ་ལ། ། རྣམ་སོགས་ང་འོ་སྙམ་མི་འབྱུང་། ། ལྟ་བས་རྒྱས་པར་འགྱུར་ཕྱིར་རོ། །