Vasubandhu - Abhidharmakoshakarika - Part 13
སོ་སོར་ཐར་དང་ལྡན་པ་བརྒྱད། ། བསམ་གཏན་སྐྱེས་དང་དེ་ལྡན་པ། ། ཟག་མེད་འཕགས་པའི་སེམས་ཅན་དང་། ། ཐ་མ་གཉིས་ནི་སེམས་རྗེས་འབྲང་། ། བར་ཆད་མེད་ལམ་སྐྱེས་དེ་གཉིས། ། མི་ལྕོགས་མེད་ལ་སྤོང་ཞེས་བྱ། ། ཤེས་བཞིན་དང་ནི་དྲན་ངག་གཉིས། ། ཡིད་དང་དབང་པོའི་སྡོམ་པ་ཡིན། ། སོ་སོར་ཐར་གནས་ཇི་སྲིད་དུ། ། མ་བཏང་བར་དག་ད་ལྟར་གྱི། ། རྣམ་རིག་མིན་ལྡན་སྐད་ཅིག་མ། ། དང་པོ་ཕྱིན་ཆད་འདས་པ་དང་། ། སྡོམ་མིན་གནས་པའང་དེ་དང་འདྲ། ། བསམ་གཏན་སྡོམ་དང་ལྡན་པ་ནི། ། རྟག་ཏུ་འདས་དང་མ་འོངས་དང་། ། འཕགས་ནི་དང་པོ་འདས་དང་མིན། ། མཉམ་གཞག་འཕགས་ལམ་གནས་དེ་གཉིས། ། ད་ལྟར་དང་ལྡན་བར་གནས་ལ། ། ཡོད་ན་དང་པོ་བར་གྱི་དང་། ། ཕྱིན་ཆད་དུས་ནི་གཉིས་དང་ངོ་། ། སྡོམ་མིན་གནས་པ་དགེ་བ་དང་། ། སྡོམ་ལ་གནས་པ་མི་དགེ་བའི། ། རྣམ་རིག་མིན་ལྡན་ཇི་སྲིད་དུ། ། རབ་དང་ཉོན་མོངས་ཤུགས་ལྡན་པར། ། རྣམ་རིག་བྱེད་ནི་ཐམས་ཅད་ལ། ། བྱེད་པ་དག་ལ་ད་ལྟར་ལྡན། ། མ་བཏང་བར་དུ་སྐད་ཅིག་མ། ། ཕྱིན་ཆད་འདས་ལྡན་མ་འོངས་མེད། ། བསྒྲིབས་པ་དང་ནི་མ་བསྒྲིབས་པ། ། འདས་པ་དག་དང་ལྡན་པའང་མེད། ། སྡོམ་པ་མིན་དང་ཉེས་སྤྱད་དང་། ། འཆལ་པའི་ཚུལ་ཁྲིམས་ལས་དེའི་ལམ། ། བར་མ་དོར་གནས་སེམས་ཞན་པས། ། བྱེད་ན་རྣམ་རིག་ཉིད་དང་ལྡན། ། རྣམ་རིག་བཏང་དང་མ་སྐྱེས་པའི། ། འཕགས་པའི་གང་ཟག་རྣམ་རིག་མིན། ། བསམ་གཏན་ལས་སྐྱེས་བསམ་གཏན་གྱི། ། ས་ཉིད་ཀྱིས་འཐོབ་ཟག་མེད་ནི། ། འཕགས་དེས་སོ་སོར་ཐར་ཞེས་པ། ། གཞན་གྱི་རྣམ་རིག་བྱེད་སོགས་ཀྱིས། ། ཇི་སྲིད་འཚོ་དང་ཉིན་ཞག་ཏུ། ། སྡོམ་པ་ཡང་དག་བླང་བར་བྱ། ། ཉིན་ཞག་པ་ཡི་སྡོམ་མིན་མེད། ། དེ་དེ་ལྟར་ནོད་མེད་ཅེས་གྲག །དམའ་བར་འདུག་སྨྲས་བཟླས་པ་ཡི། ། མི་བརྒྱན་ནམ་ནི་ནངས་པར་དུ། ། བསྙེན་གནས་ཡན་ལག་ཚང་བར་ནི། ། ནངས་པར་གཞན་ལས་ནོད་པར་བྱ། ། ཚུལ་ཁྲིམས་ཡན་ལག་བག་ཡོད་པའི། ། ཡན་ལག་བརྟུལ་ཞུགས་ཡན་ལག་སྟེ། ། བཞི་གཅིག་དེ་བཞིན་གསུམ་རིམ་བཞིན། ། དེ་ཡིས་དྲན་ཉམས་དྲེགས་པར་འགྱུར། ། གཞན་ལའང་བསྙེན་གནས་ཡོད་མོད་ཀྱི། ། སྐྱབས་སུ་མ་སོང་བ་ལ་མེད། ། དགེ་བསྙེན་ཉིད་དུ་ཁས་བླངས་པས། ། སྡོམ་པ་བསྟན་པ་དགེ་སློང་བཞིན། ། གལ་ཏེ་ཐམས་ཅད་བསྡམས་ཡིན་ན། ། སྣ་གཅིག་སྤྱོད་སོགས་ཇི་ལྟ་བུར། ། དེ་སྲུང་བ་ལ་གསུངས་ཞེས་གྲག །ཆུང་ངུ་ལ་སོགས་ཡིད་ཇི་བཞིན། ། གང་ཞིག་གསུམ་ལ་སྐྱབས་འགྲོ་དེ། ། སངས་རྒྱས་དགེ་འདུན་བྱེད་པའི་ཆོས། ། མི་སློབ་པ་དང་གཉིས་ཀ་དང་། ། མྱ་ངན་འདས་ལ་སྐྱབས་སུ་འགྲོ། ། ལོག་གཡེམ་ཤིན་ཏུ་སྨད་ཕྱིར་དང་། ། སླ་ཕྱིར་མི་བྱེད་ཐོབ་ཕྱིར་རོ། ། སྡོམ་པ་ཇི་ལྟར་ཁས་བླངས་བཞིན། ། འཐོབ་ཀྱི་རྒྱུད་ལས་མ་ཡིན་ནོ། ། བསླབ་པ་ཐམས་ཅད་འདས་གྱུར་ན། ། རྫུན་དུ་ཐལ་བར་འགྱུར་བའི་ཕྱིར། ། བཅས་པའི་ཁ་ན་མ་ཐོ་བ། ། མྱོས་འགྱུར་ལས་གཞན་བསྲུང་ཕྱིར་རོ། ། འདོད་གཏོགས་ཐམས་ཅད་གཉིས་ཀ་དང་། ། ད་ལྟར་དག་ལས་འཐོབ་པར་འགྱུར། ། བསམ་གཏན་ཟག་མེད་སྡོམ་པ་ནི། ། དངོས་དང་དུས་ནི་ཐམས་ཅད་ལས། ། སྡོམ་པ་སེམས་ཅན་ཐམས་ཅད་ལས། ། ཡན་ལག་རྒྱུ་ལ་དབྱེ་བ་ཡོད། ། སྡོམ་པ་མིན་པ་ཐམས་ཅད་དང་། ། ཡན་ལག་ཀུན་ལས་རྒྱུས་མིན་ནོ། ། སྡོམ་པ་མིན་པ་བྱ་བ་འམ། ། ཁས་ལེན་པ་ལས་འཐོབ་པར་འགྱུར། ། ལྷག་མའི་རྣམ་རིག་མིན་ཞེན་དང་། ། ལེན་དང་གུས་པར་བྱེད་པས་འཐོབ། །